Повик за истражувачки стории

Центарот за граѓански комуникации и партнерските организации БИРН и НВО Инфоцентар објавуваат повик за истражувачки стории во рамките на ЕУ проектот „Истражувачко новинарство за поттикнување реформи “.

Во рамките на овој повик најмалку четири новинари ќе бидат избрани да работат на истражувачки стории кои треба да бидат насочени на прашањето на евроатланските аспирации во контекст на демократските реформи со компаративна анализа на состојбите во земјите членки и во Македонија.

Тоа подразбира истражување на начинот на кој одредени горливи прашања како што се: борба против корупцијата, транспарентност на институциите, владеење на правото, човековите права, слободата на говор и слично, се решени во земјите членки на ЕУ и можноста за примена на тие искуства во Македонија.

Кандидатот треба да развие и разработи предлог за истражувачка сторија, како и нацрт-буџет за покривање на трошоците најмногу до 1.080 евра во денарска противвредност. Образецот за предлог-истражувањето и за буџетот можете да ги симнете ТУКА.

Избраните кандидати ќе имаат можност да користат ментор којшто ќе им помага во процесот на изготвување на истражувањето. Рокот за спроведување на истражувањето и за објавување на истражувачката сторија изнесува најмногу 2 месеци од изборот на најдобрите предлози.

Од кандидатот се очекува посветеност на истражувањето и остварување на сите обврски поврзани со истражувањето како што се: документирање на трошоците, контакти и состаноци со менторот, објавување на сторијата во медиум (во којшто апликантот работи или со којшто соработува), како и придржување до новинарските етички и професионални стандарди.

Најдобрите автори на објавените стории ќе бидат наградени и со покривање на трошоците за учество на престижната летна школа на Балканската истражувачка репортерска мрежа која ќе се одржи во последната недела од август 2018 година.

Кандидатите можат да се пријават со повеќе предлози за истражувачки стории, но на еден кандидат може да му биде прифатен само еден предлог.

Право на пријавување на конкурсот имаат сите новинари во Македонија без разлика дали се вработени или не.

Кандидатите се обврзани заедно со формуларот за апликација да испратат и нацрт-буџет за трошоците поврзани со изготвувањето на сторијата (патни трошоци – локален транспорт и патување во избраната земја ЕУ членка; комуникациски трошоци; дневници, согласно одредбите на ЕУ со кои треба да се покрие хотелското сместување, оброците и локален транспорт и итн.).

Краен рок за пријавување: 20 мај 2018 година

Апликациите треба да се достават на следната адреса: center@ccc.org.mk со напомена: Повик за истражувачки стории.

Центарот за граѓански комуникации (ЦГК) во соработка со НВО Инфоцентар и БИРН Македонија во рамките на проектот „Истражувачко новинарство за поттикнување реформи“, финансиран од Европската Унија преку програмата за поддршка на граѓанскиот сектор и слободата на медиумите 2014, објавуваат повик за доделување грантови за граѓански организации за акции поврзани со прибирање, обработка и анализа на податоци од локален, регионален или од национален интерес, за областите кои што се фокус на нивниот интерес и работење.

Предвидено е да се доделат осум (8) мали грантови во износ до 3.000 евра по грант (во денарска противвредност до 184.000 денари). Вкупниот износ на повикот изнесува 24.000 евра.

Апликациите да се достават до 1 април 2018 година. Активностите треба да се спроведуваат во период од 1 мај 2018 – 31 октомври 2018 година.

Повик за доделување грантови

Прилог 1 Образец за пријавување

Прилог 2 Буџет

Прилог 3 Опис на проектот

Преку програмата за регрантирање во рамките на проектот „Истражувачко новинарство за поттикнување реформи“, финансиран од Европската Унија, осум организации – грантисти прибраа податоци и информации од јавен карактер, а од поширок јавен интерес, од осумте плански региони во Република Македонија.

Прибраните и обработените материјали, организирани по региони,  содржат  податоци за сите 80 општини во земјата и Градот Скопје. Податоците, во временска низа од 2013 до 2016 година, се корисен ресурс за иницирање на новинарски истражувања и анализи, но и да послужат како основа за преземање на натамошни акции од страна на граѓанските организации.

Податоците ги прибраа и обработија: Младински културен центар од Битола – Пелагониски регион, ИНИ од Виница – Источен регион, ЕГРИ од Крива Паланка – Североисточен регион, НОВУС од Струмица – Југоисточен регион, Центарот за развој на заедницата од  Кичево – Југозападен регион, ИО Димитар Влахов од Велес – Вардарски регион, Институт за стратешки истражувања и едукација од Скопје – Скопски регион и Центарот за развој и унапредување на јавниот живот од Тетово – Полошки регион.

Преземете ги податочните сетови по плански региони:

Податочни сетови

Десет млади новинари од електронски и печатени медиуми учествуваа на тренингот „Основи на истражувачкото новинарство и новите медиуми“  кој се одржа од 26 до 28 јануари во Охрид. Ова е десетти тренинг спроведен во рамките на проектот „Истражувачко новинарство за поттикнување реформи“, финансиски поддржан од Европска Унија.

Тројца тренери од различни земји, Александар Ѓорѓевиќ од БИРН Србија, Алмир Шеќкановиќ од Ал Џезира Балкан и Александар Јанев од економскиот неделник Капитал, сертифицирани за обучувачи од Thomson Reuters Foundation, ги споделија своите искуства со помладите колеги, пренесувајќи  дел од своето знаење и преку интерактивни вежби да ги подобрат новинарските вештини на учесниците.

Балканската истражувачка репортерска мрежа и Центарот за граѓански комуникации во рамките на ЕУ проектот „Истражувачко новинарство за поттикнување реформи“ организираа студиско патување во Тирана од 24 до 27 јануари, каде што десетина македонски новинари имаа можност да се сретнат со претставници на медиуми, невладини организации и институции.

Новинарите од ТВ 21, МРТВ, Фокус, Макфакс, МИА, ТВ Шења, Радио МОФ и СКУП за време на неколкудневната посета разменија искуства со колегите од Албанија и се запознаа со медиумската и политичката состојба во земјата. Колегите од БИРН Албанија  ја презентираа својата работа, особено изработка на комплексни бази на податоци, последна за имотот на судиите во Албанија, и говореа за предизвиците со кои што се соочуваат новинарите  во услови на медиуми контролирани од политичката елита и олигарсите во земјата.

Новогодишното украсување и декоририрање на градовите и општините,  годинава ќе чинат 446 илјади евра. Вакви трошоци оваа година имаат само градот Скопје и 18 други општини. Лани, за украсување за новогодишните празници беа потрошени 36% повеќе, односно 733 илјади евра, но тогаш имало и пет општини повеќе кои имале вакви трошоци.

Градот Скопје и годинава ќе потроши најмногу пари за украсување – 195.122 евра, што е 44% од вкупните трошоци во земјава за оваа намена. Иста сума има потрошено и лани. Деветта година по ред (за колку што постојат расположливи податоци) договорот за украсување се склучува со иста фирма – Линк медиа плус.

Следна, според висината на трошокот за украсување е општина Струмица со 34.449 евра, а потоа следат четири општини кои потрошиле меѓу 20.000 и 30.000 евра, Карпош, Куманово, Радовиш и Тетово.

Во базата на податоци, податоците за Градот Скопје и општините Ѓорче Петров и Радовиш се преземени од известувањата за склучените договори додека, пак, за другите единици на локалната самоупорава податоците се преземени од проценетите вредности од огласите за јавни набавки објавени на Електронскиот систем за јавни набавки.

Оваа база на податоци во отворен формат, како алатка за новинарите, е изработена во рамките на проектот „Истражувачко новинарство за поттикнување реформи“, финансиран од Европската Унија.

Трошоци за новогодишно украсување

Истражување, верификација и анализа на отворените и достапни податоци на интернет беа во фокусот на обуката за новинари што во организација на Центарот за граѓански комуникации се спроведе од 22 – 24 декември во Охрид.

Работилницата на која учествуваа 15 новинари од повеќе медиуми ја водеше Кристијан Триберт повеќекратно наградуван новинар за техниките кои се нарекуваат дигитално форензично истражување.

Станува збор за употреба на најсовремени истражувачки алатки кои ги надополнуваат традиционалните новинарски техники кои преку анализа и верификација на јавно достапните информации ги откриваат темите од јавен интерес, ја разобличуваат корупцијата и пропагандата.

Учесниците на тренингот се стекнаа со вештини и познавања на модерни истражувачки алатки со што ќе ги подобрат и збогатат своите новинарски вештини и квалитетот на новинарските стории.

Кристијан Триберт како новинар известувал и правел (фото)репортажи од повеќе конфликтни области како Ирак, Сирија и Украина, а за дигиталната реконструкција на обидот за пуч во Турција е добитник и на престижната награда European Press Prize Innovation Award 2017.